〔毋忘初衷〕090118

大市今日同上個禮拜五嘅情況幾乎翻版。大市繼續上,中資金融個別發展,內房繼續落鑊,前兩日入到融創(1918)嘅都已經坐擁一成過外嘅進漲,就算係同行嘅恆大(3333)都有唔錯嘅升勢。今日幾隻標青嘅內房係世茂(0813)同埋雅居樂(3383),兩者皆創新高,前者收市升約一成,後者一成一!唯一有些少出入嘅,係海螺(0914)公布業績有驚喜,股價創新高收報42元齊頭,升百分之4。除外,上證終於爬返上3400樓上喇,等成一個月有凸,終於修成正果,企返喺該水平以上。

而美國當地時間週一收市後公布消售信貸額,最新十一月嘅增長達279.5億美元,遠高於市場預期嘅195.3億,顯示美國經濟暫時嚟講都算強壯,加息步伐仍然處理得妥當。當然,呢個只係level one喇,皆因今個禮拜最重要嘅數據,係禮拜尾大媽最新嘅通脹率。

料恆指呢幾日都應該會受制於31000呢個阻力位,以30200為支持。若有好消息支持,可直接上望挑機31958歷史高位。

內房嘅落後都已經升埋喇。剩翻落嚟嘅,可以吼舜宇(2382),股價繼上次抽升一成之後近日回順,憧憬嚟緊佢業績嘅朋友們,現貨入都OK,不過可以等大市稍調整喺100元邊位附近較安心,上望130元,止蝕97元。

冇錯,個市若果咁樣落去,上破歷史高位只係時間嘅問題,甚至乎老實講,第一季若果資金流持續高企,環球經濟亦符合預期,35000都唔可以話係進取。但係咁又代唔代表你應該唔好執輸仆入市呢?

股神巴菲特有一個金句,相信大家都家傳戶曉:”Buy low, sell high.” 即係我地成日話嘅低買高賣。咁若果記得翻起呢條搵錢終極原則,宜家入市豈不是有點無知呢?

來日方長,錢係搵唔哂嘅。唔係話積少成多係錯,不過每次都好似擠牙膏咁賺錢,你都冇癮啦。

金融小弟