【 #期權短評 – 利潤係要坐返嚟】

上個星期,見網上有唔少評論話個市升得太多,會有調整出現。今日,我想講講呢樣嘢,同一啲要注意既要點。

睇返幅圖,恒指已經升至上升區間既頂部,短期內會有調整出現,的確絕不出奇。但問題係,就算真係有調整,咁又點呢?

月初至今,港股好明顯多咗資金流入,市場成交多咗,上升股票既隻數都多咗。喺呢啲有資金流入既情況下,大市就算要跌,都唔會跌得太多。

另外一樣更重要既嘢係,我哋既心態。如果大家真係想賺大錢,就一定要搣甩「個市升得多就要調整」既錯誤觀念。呢一刻,港股正處於一個非常明顯既升勢當中,係有條件一直升、一直升,升至一啲大家都無諗過既水平。把握得到,係可以賺好多錢。但假如我哋成日都諗會調整,自然每當個市一上升少少就會諗沽貨,有呢種心態既投資者,好難賺到大錢。

港股,的確有機會有小調整,未夠貨既朋友可以把握機會買貨。至於低位已經買咗貨既朋友,就俾啲信心,俾啲耐性,貪心啲,坐到恒指34000點先好食餬。回報,係要坐返嚟既,唔敢坐貨,好難會賺到大錢。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。