〔大媽通脹放緩〕120118

傳中國作為美債第一大買家終止向美國買債,美股隨即結束今年連日嘅升浪。雖港股今日曾倒跌,不過兜兜轉轉最終都係報升收市,連升十三日,續企穩三萬一,成交依然過千億,達1288億。本地銀行股有追捧,匯控(0005)中銀香港(2388)齊創新高。手機設備股獲好友反擊,最搶眼嘅係我先前揀嘅舜宇(2382),獲瑞信維持「跑贏大市」嘅評級,消息刺激爆升逾百分之9,報112.3元,是日舜宇嘅大手成交,當中買入佔七成。重磅騰訊(0700)高位見拋售,收市失守430元,報429.4元。

水泥價格回調,故其板塊今日受重創,近日業績靚仔嘅海螺(0914)回吐逾半成,惟收市仍力守40元大關。中國建材(3323)更急瀉近百分之8。一眾內房股近日落鑊之後降溫,碧桂園(2007)、世茂(0813)、融創(1918)、恆大(3333)全線向下,其中以融創跌得較急,跌幅挨近半成,報36.85元。

「年尾效應」於內地經濟發揮未如理想,十二月內地通脹稍遜於預期,消費物價指數比預期嘅1.9%低0.1個百分比。不過製造業物價指數則比預期高0.1%。中國一月啱啱減咗存款準備金率,第二季港股表現,內地嚟緊嘅數據,非常緊要。而以目前嘅公布咗嘅數字嚟講,好難講第二季會有大牛市嘅表現。想吼中資金融股嘅朋友們,我睇怕就算個市調整,都未係明確入市嘅機會。

金融小弟