〔破頂後之前景〕210118

最近我冇出文章,因為我想等埋內地經濟數據先至一次過講,因為我都預料到屆時大市應該破咗歷史高位,企喺32000樓上。同埋我綜合嚟緊我對後市嘅一啲睇法。

結果內地經濟數據製造到驚喜,第四季經濟增長達6.9%,好過市場預期嘅6.8%,亦都超額完成大媽先前定嘅「保6.5%」嘅目標。冇錯,以我先前所講,因為呢個原因,我係進一步睇好第一季港股嘅表現,加上最近美元續弱勢,吸引環球投資者嘅資金流入港股,順風順水,故農曆新年前好可能能夠進一步再創高峰。

經濟好,加上一月尾人行將會調低存款準備金率,故中資金融股將會成為最受惠嘅板塊。內房亦都將會受惠,尤其最新數字顯示,內地住宅樓價指數穩步上揚。不過,呢個好消息,最近可能被行家碧桂園(2007)配股嘅消息所影響。始終負債係內房嘅天敵,房地產資金需求高,但係旗下大部分都係非流動資產,所以內房負率都係比一般高,要配股嘅機會自然地較大。不過,好似今次碧桂園咁,若果配股嘅規模唔係好大,咁都唔係好大礙,亦都唔足以煽動一股同兩年前相近嘅配股潮。

不過,宜家個市即將踏入牛市最後嘅階段,即係升得最急嘅時候。架車開得越快,唔想攬住一齊炒車嘅話,就要每逢可行嘅情況下跳車。尤其係會升得好急嘅港交所(0388)。一如旣住,大牛市總要有極大成交配合,準則通常會以1500億、甚至2000億作準。大成交,自然刺激港交所嘅表現。同十年前一樣,冇貨嘅朋友,388係你十誡之一,而持貨者就應該要快啲諗吓止賺價執生。

最近有一位股評人被數位網民唔妥佢,批評佢日日唱反調嘅講法唔專業,大師俾人笑話係「大輸」。我亦都覺得,睇錯市嘅淡友們,講錯咗其實唔係好出奇,最出名嘅股評員,準確率都係僅高過五成,但係最緊要嘅係唔好死雞撐飯蓋,堅持自己嗰套錯嘅道理,日復日固執己見,又點會唔犯眾憎啊。

不過,我覺得宜家稍為回調會令到大市睇落健康啲,料初步支持為31400,若32000企得穩,upside potential喺過年嘅時候達33000。

過年之後,就有幾個大因素要睇。首先係美元、港元及人民幣嘅走勢。港股要繼續有運行,必先要美元疲弱、人民幣走強呢個形勢持續。美元疲元,間接令美股及港股可吸引更多環球資金流入股市。而人民幣走強,有助內地企業業績嘅表現,尤其三月呢個大業績期將至。之後,順其自然,就當然係美國加息嘅走向喇,特別係最近美國嘅經濟都比市場預料嘅好,大家睇吓最近美國嘅失業數據就會知道。加上美元持續弱態,股市又牛氣沖天,聯儲局亦都有話過今年最少要加三次息。簡單嘅數學都會話你聽,平均今年四個月你都會預佢加一次,而最近債市亦開始有反映呢個情況,皆因近日債息有持續嘅升勢,反映市場預料距離聯儲局今年加息開齋都唔會太耐。最後同埋最緊要嘅,當然係各大企業於三月公布業績嘅表現喇。先前美企公布第四季嘅成績都相當不俗,例如IBM、JP等等,故成為美市上升嘅重要支持。環球牛市若唔要見頂,企業盈利仍然係重要元素其一。以香港上市嘅企業嚟講,最緊要嘅當然係重磅、中資金融、及內房嘅成績表。

雖則股市幾乎日日升,但係唔好以為大牛市必定人人歡喜。其實喺升市入面都有人愁,尤其係炒期貨牛熊證低保障高風險嗰類投資工具,仲要借錢玩孖展。牛市臨近尾聲,同常先要開始有因投資失利嘅悲劇發生。最近陸續有更多有關是次升市投資失利嘅新聞浮面,其中一名月入兩萬、一家四口家庭支柱嘅爸爸,因投資過度進取,借逾100萬作牛熊證衍生工具投資。本來曾大賺逾60萬,結果蒙受巨大損失,連本金都蝕埋。他其後嘗試向其太太引瞞事實,搵財務公司求助,當然最終都要申請破產。

同類案件有另一位月入三萬嘅男士,為太太上車及帶嚟更舒適嘅生活,進行數筆牛熊證嘅交易。同樣曾經賺60萬,不過其後貪婪始終侵蝕佢嘅肉體,再向「財仔」借70萬加注,結果一鋪清袋,更加要太太繳還債務。

我信市道嚟緊會好,不過我一直以嚟都相信,上帝要你滅亡,必先要你瘋狂:切記要遷住嚟玩。以上活生生嘅例子證明,要喺牛市賺錢,唔係必然嘅事,亦都好有08年爆煲前嘅味道。冇做好功課、「人云亦云、人買你買」心態嘅投資者們,往往都會喺成為最大輸家。尤其借錢投資、觸犯第二條十誡嘅投資者們,幾本上係墊屍底。達唔到投資所需嘅經濟能力,就絕對唔可以勉強自己。呢個道理,不單只局限於金融股票市場,更加包括樓市買賣。大家記得於投資時要醒目。

後市繼續升,唔代表你一定要扑入個市。咁大隻鴿乸隨街跳,唔代表你一定會要。

金融小弟