〔唔加息留下大問號〕020218

美國經濟增長稍遜於預期,但係就業數據持續理想,不過美國噚日決定留下一線唔加息,維持息口於1.25%至1.5%。正當以為耶倫最後一次議息會派糖,佢緊隨就預示有見通脹將持續增長,故加息嘅日子將至,搞到孳息率係咁向上爬,利淡美股,缸友們都見驚青續拋貨,故美市由高位至今調整約500點。港股嘅投資者當然趁機派貨,各重磅股都見回吐,令大市企唔穩33000呢個位。不過,呢次回調暫時喺一千點以內,仍屬健康調整。大市一日唔穿前歷史高位31958,一日都唔算係牛轉熊。

不過,聯儲局今鋪唔加息,就喺市場留低咗幾個大問號。因為下次議息嘅時候,聯儲局嘅領袖將另有其人。究竟新一代嘅聯儲局對息口嘅取向,將會傾向鴿派定係鷹派,都仲係有待分曉。知期未來息口嘅決定,基本上都決定環球股市食粥食飯。若果不幸新班底較為鷹派嘅話,將會有眾多直接及間接嘅影響。

直接嘅影響,當然係債息同埋美元嘅走向。債息個勢宜家咁熾熱,加息嘅話就實食冇黐牙架喇。至於美元會唔會借勢反彈,我唔咁擔保,不過最少都為美元帶嚟止血嘅作用。

間接嚟講,影響就深遠得多囉~小則限制美國經濟近期嘅蓬勃,大則影響大公司嘅盈利能力。加上美元若果唔太彈嘅話,咁可能唔洗下年,今年下半年當公司出業績嘅時候,股市就會出現相當嘅調整。換句話講:好儲定少少錢到時喺啱價嘅時候掃貨!

不過,過去一年嘅環球經濟都造好,美國同中國都享受過經濟彭脹。故此,嚟緊企業嘅業績我估都理應會靚仔喇,除咗手機設備股以外,怪就怪「iPhone 叉」銷售唔理想喇。有時睇吓舜宇嘅鏡頭銷量稍為放緩,某程度上都能夠反映iPhone X 滯銷嘅影響。嚟緊我睇好嘅,包括藍籌內險、友邦、港交所、匯豐、同埋一眾一線內房。喺之後幾篇專欄,我都會講吓當中嘅原因。

首當其衝將公布業績嘅公司將會係港交所同埋大笨象。我建議宜家心紅想入市嘅朋友們,可能時間上太遲喇。不況預備定買包花生,準備睇好戲!

金融小弟