〔撒旦降臨,攬定安全帶〕060218

美股前日撒旦降臨,四捨五入收市跌666點。港股昨日開市應聲跌逾800點,不過多得大媽接貨,狂掃中工建,四點鐘埋單跌幅收窄至300點。

晚飯後,正當我寫緊稿嘅時候,我最期待嘅畫面出現喇,400、600、800……1500!道瓊斯足足跌咗一千五百點~電腦面前嘅我,親眼見證咗歷史。

其實美股嘅響鐘比起我地更加明顯,恆指假假地喺11月尾12月頭做過些少調整,但係美國嘅市真係乾升咗差唔多大半年,幾乎冇調整過一口氣咁樣升!所以,前昨兩日共跌約1800點,都只係算皮毛。

好喇,現實啲,再破頂嘅機會,就算藍籌業績幾靚都唔會點有。可能嚟緊北水會同個市抗行一陣,不過相信唔會持久得太耐,因為你睇吓昨日佢地撈嗰轉,今日幾傷!真係冇陰功~

嚟緊呢幾日,我會逐一同大家探討吓呢次股災嘅來龍去脈,附上一啲應變策略俾讀者。

呢次股災嘅原因其實都唔係話唔明顯。觸發點,其實由我喺耶倫決定唔加息之後出咗篇文章同大家講過。耶倫唔加息,基本上完美地做出反效果,為市場帶嚟一個更大嘅問號。一心諗住唔想個市冧,所以唔加息,呢個諗法就大錯特錯喇。唔加息,只會支持經濟,但係金融市場永遠都係環繞著不確定性uncertainty。故此,唔加息嘅決定,直接為市場播種恐慌,令到環球股市即刻U-turn轉呔。

不過,今次都要配合市場對企業業績過高嘅期望,先至可以向市場狠狠地踩多一腳。市道太好嘅時候,投資者及市場嘅期望會好自然地變得過高,將原本嘅驚喜都要成為意料之內嘅事。今次埃克森美乎同埋雪佛龍公布成績表就係完美嘅例子。

咁展望會點呢?牛三完後,同常都會先嚟兩三次大拋售,美股宜家已經由高位回落一成有凸,預料港股都應該會睇齊。幅度嚟計,30000為短期嘅支撐。不過,大市嘅表現都仲要似乎幾項因素嚟緊嘅演變。

一、就當然係美元喇。美元一日有支持回勇,一日「仲有訂企」,股市一日都冇運行。債市孳息率亦都係相似嘅指標。二、經濟數據,美國嘅經濟數據若持續向好,咁只會擴大市場對加息嘅恐慌。最後同埋最重要嘅,今次嘅牛市,有一半都要歸功於我們嘅大媽。所以北水決定一切。點解呢?因為若果大家有留意,今次大媽們喺港股落咗重皮嘅孖展。玩股票,可以令你最瘋癲嘅其中一樣,就係借孖展炒股票,因為兩極嘅potential都好比跳樓機咁高。今次北水孖展總額有九位數字。孖展最大鑊嘅嘢,莫過於要補倉同斬倉。若果呢轉回嘅時候屠宰北水嘅孖展倉,咁就隨時美股昨日電腦盤翻版,一觸即發,正式牛轉熊。不過,當然又未到嗰個時候,現階段好難講係唔係踏入熊市。不過,牛三不再就幾乎塵埃落定~

睇緊呢篇文章嘅你地,梗係好緊張問點樣部署好:我都想要啲時間組織吓我嘅想法,收市再同大家講!

金融小弟