https://www.facebook.com/cablefinance/videos/1802120929838970/?hc_ref=ARQdFLWoBlNxpEh7hV8_65FzMYIEh4EgHKLkTaLbfCx9rlPQV3V_ba4ilrDsFro551Q

〔跌市唔好怯,冇貨唔好太急接〕070218

美股股災漫延至環球股市,香港亦都應聲下跌,恆指開市已經跌千二點,其後跌幅一度收窄至約900點,不過尾市沽盤再湧現,全日跌1649點,以點數計為歷來第二大跌幅。隨後,美股昨日再跌開逾五百點,其後過山車式不斷反彈及下挫,最終臨收市好友打贏咗場仗,道指升超過500點收市,高低波幅超越一千點。

無疑大家都會被股災打亂陣腳。以下係我個人嘅見解,若唔啱聽,覺得我誤人子弟,我唔阻你發達。

派藥方之前,我想大家了解吓我對後市槪括嘅睇法。呢兩日跌得咁急,恆指由高位跌咗2000點有凸,所以嚟緊係點都會有一堆人執死雞搏反彈。呢班人可唔可以做出一個V型反彈嘅走勢,言之尚早。反而我對後市仍然存在憂慮。其中最令人髮指嘅係呢班人究竟有幾多資金打低巨鱷呢?反正距離高位仲有成2000點,料今日反彈都唔會過千點以外,所以就算要入市,都唔洗今日開市即刻仆入去。

再且,其實嚟緊牛轉熊嘅關鍵,除咗係美國息口嘅因素之外,孖展都係其中之一。牛市總會令到一啲人好似食咗豹子膽,若果孖倉要補倉嘅話,呢班人嘅水就會不斷削弱,最終就會無以為繼地被就地處斬。故此,港股嚟緊有啲大位,一定唔可以失。第一個大位,當然係30000點喇。

咁大家應該點樣部署法呢?唔,我先將讀者們分為兩類:平倉者、持倉者。

若果你係前者嘅話呢,咁相對上你要掛慮嘅嘢少得多。首先,問吓自己想唔想入市。若果你喺呢年嘅牛市已經搵夠唔想搵,不仿好似我咁,享受吓平倉嘅自在。不過,視今次大跌為機會嘅你,就要小心啲入市喇。First thing’s first,買股千祈唔好以指數為入貨嘅指標。我地一定要釐清股價同埋指數嘅水位。指數只係成份股嘅某均值,對買股嚟講參考價值有限。最重要嘅,係你要做翻少少功課,永遠以大位落盤。同埋買入個位,一定要諗好止蝕價你先至好買:究竟你定嘅止蝕價,若果萬一不幸再大跌嘅時候,止蝕嘅價位你大唔大機會可以走得甩呢?當然喇,止蝕嘅百分比唔可以太高或太低。平常嘅市場嚟講,同常都係downside嘅10%。不過,喺咁chok嘅牛市入面,10% rule要變成5% rule。至於若果入咗貨之後大市真係健康地向上,咁止賺方面,可以用現價5%嘅下限作標準。喺牛市入面,我同常都會用呢條5% rule,你跟唔跟適隨專便。最後,奉勸大家個市嘅勢一日未清晰,一日你都唔好掂輪住。

持倉者就當然會係愁啲喇。不過當中都仲要分開兩批,盤面賺緊同蝕緊嘅缸友。賺緊嘅,就當然無大問題,若大市中期再走上機會唔大嘅時候,咁就要真係認真部署斬纜過好日子,回復平倉自由身。而盤面蝕緊嘅朋友們,尤其係高位有追貨嗰啲兄弟,塊面就當然刻咗個「愁」字。不過,未到最後你賣嗰一刻,你都未算輸,股票嘅妙處就係呢一度。當然,唔係叫你等一世喇,點都要做翻少少風險管理。今日如無意外,點都會上翻七百八百點,要留意埋今個禮拜餘下嘅交易日,反彈嘅勢會唔會落喺你隻股身上。若果會嘅呢,就當然自己定好止蝕就無事由得佢自由發揮喇。不過,若果你持倉嘅股份屬較落後嘅股份,咁就盡早諗翻一個好嘅價錢止血啦~其實呢一點,相信大家都好清楚喇,皆因成個牛市都係環繞著呢個格局。國壽就係一個典型嘅例子:業績盈喜又靚仔,惟股價方面俾同行嘅平保新保太保跑贏佢。

個人建議建設銀行為搏反彈嘅首選。北水流入量又高,本身基本因素為同行最理想:對上業績穩陣、藍籌重磅、高息、內銀嚟講又係各大行嘅佳寵、長子嫡孫,all-round嚟計係number 1。個人認為若睇好後市,8.5樓下可以考慮一注,不過切記喺牛市第一chok之後,買入記得要分批買,降低風險。

以上純屬個人意見及見解,希望大家為自己嘅投資負上全責,同埋千祈唔好俾大鱷震倉震咗出嚟:越係喺緊急關頭,頭腦就要越保持清晰,將先前嘅計劃付諸實行。趟若猶疑半分,分分鐘你個倉血流成河——十年前嘅教訓,你唔係唔知架喇~我自己就好嚮往平倉嘅自由身,好比分手後單身嘅感覺!哈哈~

附上我認為講得有良心嘅分析。雖分析偏熊,不過提及嘅事實值得大家諗吓。(同埋睇吓大師昨日開心屎lu~嘴角含春~~)

祝各位好運!

金融小弟
(資料來源:有線財經資訊台)