〔港股跟跌唔跟升〕100218

本應是週六嘅文章如下:

美股自大跌之後稍為有喘定嘅跡象,不過一波未完,一波又起,當地禮拜四收市再挫一千點。內地除咗再提起「去槓桿」政策之外,海航集團借貸有過期嘅跡象,加上最新內地貿易數據,入口飆升三成六,遠高於市場預期,令貿易順差急縮水。上綜再次頂唔順,先後3300、3200點大位都穿埋,先前嘅升勢幾乎對消,昨日再挫逾百分之3,日間更曾經失守3100點。

祖國及美國有難,港股就然跟住冇運行,不單只週四未能成功反彈,昨日更加瀉逾900點,早上時分更失守100天線!

阿爺近排一再開口提及去槓桿,個市就好似被人點咗穴咁。上綜自美股股災之後冇反彈過。港股點都假假地反彈咗一個上晝,不過內地就真係問題重重。其最大嘅問題,就係冇人知道內地嘅問題有幾多、有幾大,其後果將會幾嚴重,大家都係估估吓半知半解。以我之前所講,金融市場嘅死穴就係不確定性,越多不確定因素,市場就會越慌。

先講吓海航今次呢單「蘇州屎」。大綱就係傳有報道稱海航旗下有於中資銀行嘅債務,出現逾期償付本金及利息。海航當然唔會認頭架喇,仲話自己財政狀況不知幾健康。不過海航咁大間集團,媒體豈會有咁大個「沙卜」作出誣蔑啊:呢單嘢真多過假。

咁當然佢地違規,咁阿爺點都要出聲架喇。但係大家都會發覺,內地官方金融代表都仲係未點就此事件作出確實嘅公開評論。而就係因為咁,令到市場開始揣測究竟發生緊啲咩事。

市場最終得出嘅推論,就係估阿爺現時陷入兩難局面。若果唔執正嚟做,海航嘅問題依然未解決。但係若果執正嚟做嘅話,咁海航最多都係申請破產或倒閉,不會咁樣就會喺市場上創先例,隨時引發多間同類公司倒閉。據悉涉及同樣情況嘅內地上市公司多達逾一百間,如此嘅骨牌效應,內地嘅股市將兇多吉少。阿爺斷估都唔會執正架喇,而呢個隱憂沒辦法地得到解決方案,好似霧霾咁籠罩著內地股市。所以就算美股反彈,港股跟唔上嘅機會都唔細。

大家都係繼續睇實美國啲「厘」同埋美元嚟做人喇。農曆新年氣氛濃,料北水下週將撤,故恆指農曆年前勢穿29000,下望嘅首個支持位處於28000。若28000穿,其後亦未見反彈,咁牛轉熊嘅機會較大。

金融小弟