〔狗年宜高追定落車?〕190218

恭喜發財,狗年頭三日都已經過咗喇,一年一度齊人嘅家庭聚會,相信大家都應該過得好開心。雖然係一年一度,但都係一個珍貴嘅時刻。即使五年、十年難得一遇嘅牛年可以俾你遇上,我相信農曆年嘅喜樂,真係用錢都買唔到。

送雞迎狗,今年大家又應該以咩心態迎接來年嘅股市呢?坊間一如既往都係好淡參半,上次我就講咗啲比較短線啲嘅因素,今次我會講闊的,講吓我對來年嘅睇法。

內地就唔洗點講喇,因為今次升市都冇佢份,內地一直都係被種種不明朗因素環繞。唔係樂視風波,海航債款過期,經濟復甦埋尾,就係打擊壞帳去槓桿。不過呢啲問題一日唔解決,一日個市都唔樂觀。睇翻最近美國經濟數據,市場一向欲經濟膨漲嘅情況放慢,好令聯儲局今年唔會加快加息步伐。不過,我發覺市場對新消息嘅反映,開始出現矛盾嘅跡象。以啱啱嗰個禮拜而言,美國通脹維持2.1個百仙,高於市場預期。不過,美國嘅資產市場並未有如近日般,因應加息加快風險增加,呈現出相應嘅現象。反而市場以基本經濟面嘅角度嚟解讀今次嘅消息,繼續為股市輸入資金,令美股得以承繼近日反彈嘅走勢。

你可能以為市場只係換咗個角度嚟看待呢次嘅數據,但係矛盾就在於此喇!同日美國亦都有公布零售嘅數據。不過,零售數據嘅表現卻遜於市場先前嘅共識。咁就奇喇,一時又話驚聯儲局加息偷步,一時又話經濟強勁,到經濟數據有參差嘅時候,又未能正確地反映,呢度就係正正我所講嘅「矛盾」嘅所在喇。

市場嘅運作出現不尋常嘅徵狀,可以隨時係蘊釀金融市場震盪嘅導火線。當呢啲未如常反映嘅因素累積,然後一次過釋放,咁就『有「股」「林峯」』:股市係咁「chok」!(好爛~~~哈哈哈~~)

狗年表現,四字之曰:「虎頭蛇尾」。我有可能睇錯,不過我總係覺得最近我聞到血腥味,且越嚟越近。究竟今轉反彈喺咪暗藏殺機,狗年自有分曉。

金融小弟