〔美元油價續強要警惕〕200518

港股雖然喺呢個禮拜穩守三萬一,突破先前30800上落市區間嘅上方。騰訊首季績佳,亦重上400元樓上嘅位置。今個星期嘅表現,能否反映大市氣氛好轉?

現階段嘅答案,都係一個firm嘅NO。

以微觀嘅觀察,除咗騰訊績佳做好外,一眾中資及藍籌都唔算叫做有咩氣勢可言。大家亦都會發覺最近大市成交,都只係徘徊1000億呢個水平,同先前年頭或者上年年尾比較,成交量大不如前。

微觀嘅結果,背後嘅原因大多都以宏觀嘅因素作誘因。列出最近大圍嘅因素,債息週四一度高見3.1厘7年高位。聯儲成員於週三發表鷹派嘅言論,刺激美元走勢更上一層樓,美匯指數週五收市升破93.5。美國零售銷售數據增長,與市場預期持平。油價近日亦繼續「馬騮上樹」,闖過70美元關口。種種以上嘅因素,都係引致息口上行嘅導火線。再加上貿易戰仍然未有緩和嘅跡象,故市場背後嘅憂慮,根本就未曾消化。雖然話就話VIX恐慌指數由上月高位近20嘅水平跌至現今約13點,不過大家唔好被矇騙,以VIX定作為市場強弱嘅指標。金融市場同經濟前景永遠先至係真正嘅孖生兄弟,而厘率上行壓力持續,股市交投趨淡都不足以為奇。

部署依舊,都係盡量有進賬時盡快減磅。若你唔想完全平倉,仍可留有一少部分股數作為較長線嘅投資。不過,現階段宜逐步鎖定利潤,未雨綢繆。踢波都唔係90分鐘攻陷對方,防守都係不可忽視嘅一環:投資並無兩樣。

金融小弟