〔「紅」劫難逃〕240618

貿易戰於啱啱呢個禮拜升級,特朗普於禮拜初宣布落實500億美元關稅除外,並同時擬定2000億美元嘅關稅,用作對付中國反抗嘅方案,形勢進一步邁向沸點。上證週二出現恐慌性拋售,重災區依舊都係手機設備股及科技股板塊,多隻行內股份於內地市場出現跌停嘅跡象。上證週二低位跌穿2900點,其後該位置都宣告失守。港股成為美國同中國呢一份「三文治」嘅餡料,夾到實一實,再次向下坡挑戰29300水位,失守200天平均線。美市反而雖然都有受影響,但係其調整幅度明顯比內地及香港少。唔通近日股市嘅表現,會唔會經已暗示貿易戰嘅輸贏呢?

貿易戰嘅核心問題,係中國錄得貿易順差,而美國先至係有赤字嘅一方。喺普通「損失規避」嘅經濟理論底下,美國提出嘅方案當然會比中國更辣、更進取。換句話講,相比起中國,美國更加輸得起,因為不竟佢地一路以來都係貿易輸家,而中國一向都係一個貿易驅動嘅經濟體,故中方嘅態度較為審慎不足以為奇。大家都可以以最近貿易戰嘅動態去引證以上嘅觀點:簡單地查察美國關稅嘅次數及涉及金額,美國暫時明顯佔優;而中國出口術較多,相對地缺乏實質嘅應對良策:主動權明顯落於特朗普手中。

雙方態度強硬差異,更重要嘅原因,係中美嘅經濟強弱懸殊。內地經濟近日持續發出弱勢嘅信號。不論新增貸款、投資、零售數據,數字最終一律都令市場失望。美國經濟卻仍然維持強壯,同中國經濟簡直判若水火。再講吓雙方採取利率正常化政策嘅取向,美國經濟暫時仍然能夠支撐著加息週期,不過內地經濟最近卻傳出降準嘅消息。顯然中國經濟喺貿易戰上,若果仍然未能擺脫現時走勢,中國根本唔係美國嘅對手。

你或者都會問,中國都可以從間接嘅方法對抗美國。但係大家要留意,當中大部分政策都係弊多於利:拋售美國國債只會令人民幣匯價再一度上升,效果適得其反;央行貶值中民幣,卻只會令內地企業更傷腦筋,再者內地身為一個轉趨成熟嘅經濟體,再唔會有容納貨幣貶值嘅空間;杯葛美國商品看似為一個可行嘅方法,不過要記得中方係錄得順差嘅一方,所以儘管點樣杯葛,美國同中國對比之下都係贏家。

中國暫時宜家都有可行嘅方案:可以以牙還牙,好似中興咁制裁駐中嘅美國公司、同埋趁美國向幾乎全世界所有主要經濟體,都實施貿易制裁,可以進一步深化同其他國家嘅貿易關係,令內地經濟擺脫對向美國出口嘅依賴。不過,更重要嘅大前提,係中國要盡快防止經濟持續放緩,設法以非貨幣政策嘅途徑刺激經濟,否則中國容易落後於環球經濟利率正常化嘅氣候,隨時輸得仲多。

見及貿易戰進一步嘅發展,想撈底嘅都不宜太進取,可以等及形勢進一步明朗化再進取啲,都未算係叫遲。

金融小弟