[內裡乾坤嘅摸索]020818

貿易戰嘅最新發展都喺市場預期以內,美國繼續壯膽,而中國就暫時睇住人仔唔俾佢大冧,加上最近工作頻忙,故近來都未有出刊更新,望見諒。

不過,我最近諗到貿易戰一個較為有趣嘅說法,想同大家分享一下。

自二次世界大戰以後,美國一直為世界上領導嘅經濟體,係世界一哥。自然地,美元亦都成為國際貨幣籃子上比重最高嘅儲備貨幣,故所有國家嘅儲備,都有一定比例嘅美元。

美國近來都被龐大嘅貿易逆差籠罩,故需要同樣大小嘅資本項目順差充撐,意味著本土債務定必大於海外投資。不過,過往事實卻恰好相反,美國擁有資本項目順差之餘,本土債務亦未必大於海外及本地資產。呢二十年嚟息率一直受多項放寬政策影響下走下跛,令到債務嘅價值下跌,股票市場長期走勢平穩上揚,加上海外資產嘅yield一般都比美國高,形成美國本土債務價值與總資產價值相若,令到資本項目順差得以長久,不斷引入外來嘅資金。呢種現象亦都名為Exorbitant privilege,早於18世紀嘅時候,該現象發生於當代「一哥」英國。不過,現今息口已有一段時間處於比平均低嘅水平。所以,要延續其資本項目順差,息口務必要回順至約歷史平均3厘左右嘅水平。貨幣方面,因為美元係儲備貨幣no.1,所以就算有進口多與少,都唔會對美元構成嚴重嘅貨幣危機。

而中國依家有意取代美國呢個「貨幣一哥」嘅地位,令人民幣及內地經濟增加承托力。不過,中國向來都喺淨出口嘅經濟體,同美國正正相反。所以,中國長遠有必令人民幣緩慢地走強,及要達到貿易平衡。

所以美國先至會於貿易同中國宣戰,可以縮窄自己嘅貿易逆差之餘,亦都可以防礙中國呢個最大競爭者。貿易戰大家都知道,為人民幣自2015年一路以來嘅牛市「打斷柄」。不過,中國都可能心知要取奪呢個「一哥」位置,都唔係一朝一夕嘅事,所以直到現時人行都放任人民幣下跌,只係跌得太急嘅時候幫「人仔」托住啲重要技術性嘅關口,似乎人行喺上次15年嘅教訓「學精」咗。人行現時嘅姿態,貌似係等緊美國經濟進入衰退,不竟內地經濟於不久將來理應都會放緩,以便防止內地最近嘅金融泡沫延續,要「放吓氣」。到時雙方先至喺同一個擂台打鬥,打起上嚟都公平啲啊!

金融小弟