【 #期權短評 – 牛一策略要點】

大概兩個星期前,我第一次話熊市隨時可能結束。當時我感覺到,我呢句說話,根本就無人相信。比較好少少既係,月初有去港交所聽我講座既朋友,會知多啲我點解我會咁睇。但我估,果陣真係相信既人,應該都係好少。

但時至今日,情況肯定已經唔同。

如果大家已經覺得港股入機會入牛既話,以下係一啲策略要點:
1) 牛一,重點係要有一部份股票,股價不論市況升跌都可以穩步上升。港股,已經出現咗一啲呢種型既股票。
2) 「會唔會唔夠水位升?」問得呢個問題,好明顯就係信心唔夠,未走得出之前跌市既陰霾。但我想講,牛市既強勢股,係唔會有唔夠水位升既問題。問題,係你識唔識揀啱股票去買。
3) 牛市初期,市場仍不時會有壞消息傳出。但記住,我哋既關注點唔係消息既本身,而係市場對消息既反應。有壞消息,但個市不跌反升,呢個係非常利好既訊號。
4) 唔好再花時間確認呢個係唔係牛市。如果一定要100%確認呢個係牛市先買貨,到時可能已經係牛市二期既尾段。
5) 留意住升市時既成交,可唔可以一直增加。

恒生指數,大家要有心理準備會幾chok。但如果你揸住既股票,喺跌市仲可以力保不失,穩步上升,咁就恭喜你,隻股票要一直揸落去。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。