【 #期權短評 – 到達決戰時刻】

今日，想集中update一下恒指下跌通道既情況。

現時，通道頂位大概處於28000點左右，並以每日約24點既速度下跌。換句話說，一個月會跌約500點。

呢個情況，有啲決戰既意味。

恒指，若能夠企穩再上，大概兩個星期後，就能夠徹底擺脫下跌通道，整體走勢亦會變得靚仔好多。

而我諗大家都有留意到，最近多咗好多大行開始話睇返好新興市場，以及話中資股跌幅已過大，有長線投資價值。

暫時，已有部份資金開始重回港股，但好明顯，以此刻既成交估算，肯定有好多大戶只係口講睇好，但未係真正大舉入市。

咁幾時先會大舉入市？

投資市場，永遠都係瘦田無人耕，耕開就有人爭。只要整體港股可以突破下跌通道，走勢改善，就會吸引到更多資金流入股市。到時，就係我哋博Long Call既機會。

留意住呢啲signal，一有機會就跟策略做啦。

風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。